‘काभ्रे महोत्सव २०७९’ असोजमा आयोजना गरिने

बनेपा । ‘व्यावसायिक लगानी अभिवृद्धि, काभ्रेको समुन्नति र समृद्धि’ को नारा आत्मसाथ गर्दै आगामी असोज ३ गतेदेखि १५ गतेसम्म बनेपाको उग्रेश्वर महादेव मन्दिर परिसरमा काभ्रे महोत्सव २०७९ आयोजना गरिने भएको छ ।

काभ्रे उद्योग वाणिज्य संघले बडा दशैंको पुर्वसन्ध्यामा गर्ने कार्यक्रममा उपत्यकाका जिल्लाहरू, काभ्रे, सिन्धुली, दोलखा लगायतकाका बासिन्दाहरूले लाभ लिन सक्ने उल्लेख गरेको छ ‌। काभ्रे उद्योग वाणिज्य संघका अध्यक्ष राजेन्द्र पसछेंले कोभिड पछि थलिएको अर्थतन्त्र उकास्न महोत्सव फलदायी हुने बताउनु भयो ।

महोत्सवमा स्थानीय कलासंस्कृति, औधोगिक व्यापार, घरेलु उत्पादन, कृषि, पर्यटन प्रवर्धनको जमर्को गर्ने र साथमा स्थानीय तथा राष्ट्रिय ख्यातिप्राप्त कलाकारको बेजोड हास्यव्यङ्ग्य एवं साँस्कृतिक प्रस्तुति रहने काभ्रे उद्योग वाणिज्य संघका महासचिव रविन्द्र वैदारले जानकारी दिनुभयो ।

कार्यक्रममा व्यवसायी एवं नेपाल उद्योग वाणिज्य महासँघका सस्य सुरकृष्ण बैद्य, काभ्रे उद्योग वाणिज्य संघका पुर्व अध्यक्ष/सल्लाहकारहरू एवं जिल्लामा रहेर विभिन्न सञ्चारमाध्यममा सक्रिय सञ्चारकर्मीहरूको उल्लेख्य उपस्थिति रहेको थियो ।