नेकपा एमाले चौंरीदेउराली – काठमाण्डौं मञ्चको अध्यक्षमा गौतम सर्वसम्मत

बनेपा । आगामी मंसिर ४ मा हुने  प्रतिनिधिसभा तथा प्रदेशसभा चुनावको पुर्वसन्ध्यामा नेकपा एमाले चौंरीदेउराली-काठमाण्डौं सम्पर्क मञ्चको अध्यक्षमा युवा नेता अमृत गौतम सर्वसम्मत चयन भएका छन् ।

कार्यक्रम नेकपा एमाले काभ्रे इन्चार्ज, पोलिट्व्युरो सदस्य पूर्व मन्त्री गोकुल प्रसाद बास्कोटाको प्रमुख आतिथ्यतामा सम्पन्न भएको थियो ।कार्यक्रमलाई सम्बोधन गर्दै प्रमुख अतिथि बास्कोटाले नेकपा एमाले टोलटोलमा जान आवश्यक रहेको र आगामी निर्वाचनमा नेकपा एमालेले सानदार विजय हाँसिल गर्ने उद्घोष गरे ।

त्यस्तै मञ्चका नवनिर्वाचित अध्यक्ष गौतमले नेपालका राजनीतिक दलहरु प्रतिको वितृष्णा एवं बहुदलिय व्यवस्था प्रति खडा भएको राजनीतिक चुनौतीलाई वैचारिक रुपमा चिर्नका  लागि आफू सक्रिय रहने बताए । आगामी निर्वाचनमा अपेक्षित परिणाम हाँसिल गर्ने गरी जिम्मेवारी पूरा गर्ने प्रण समेत गौतमले लिएका छन् ।

सम्पर्क मञ्चको अध्यक्षको जिम्मेवारी प्रदान गरिएकोमा गौतमले नेकपा(एमाले) चौंरीदेउराली गाँउपालिकाकाका नेतृत्व, समकक्षीहरू लगायतका व्यक्तिहरूलाई आभार प्रकट गरेका छन् । सबैको साथ, सहयोग अनि सद्भाव प्राप्त भइरहने विश्वास समेत गौतमले लिएका छन् ।

कार्यक्रममा नेकपा एमाले केन्द्रिय सदस्य नविना लामा, नेकपा एमाले काभ्रेका उपाध्यक्ष चन्द्र लामा, सचिव राजन भुर्तेल, स्थानीय चुनावमा चौरीदेउराली गाउँपालिका अध्यक्षका प्रत्याशी जितराम लामा, युवा संघका नेता विक्रम चौलागाईं लगायतका नेता कार्यकर्ताहरूको उपस्थिति रहेको थियो । कार्यक्रममा कार्यकर्तालाई प्रशिक्षण दिइएको थियो भने मञ्चले नयाँ कमिटी पदाधिकारी समेत पूर्णता पाएको छ ।