धुलिखेल २८ किलोमा आगलागी हुँदा २ करोड भन्दा धेरै क्षति

धुलिखेल । आज धुलिखेल नगरपालिका वडा नं. ४, अठ्ठाईस किलो स्थित एक घरमा आगलागी भएको छ ।

शम्भु कार्कीको चार तले पक्की घरमा आगलागी हुँदा करोडौँ मालसामान जलेर नष्ट भएका छन् ।

चाउमिन फ्याक्ट्रीमा चाउमिन पकाउने क्रममा ग्याँसबाट अचानक आगोलागी भएको भन्ने सूचनाको आधारमा जिल्ला प्रहरी कार्यालय धुलिखेलेलबाट प्रहरी नायव उपरीक्षक ढुण्डीराज न्यौपानेको नेतृत्वमा ४० जनाको प्रहरी टोली घटना स्थल पुगेको थियो ।

प्रहरी नायव उपरीक्षकको समन्वयमा धुलिखेल नगरपालिकाबाट–१ वटा, भक्तपुर नगरपालिकाबाट–१ र पाँचखालबाट–१ वटा गरी जम्मा ३ वटा दमकल, बनेपा नगरपालिकाबाट–२ वटा पानीट्याङ्कर, नेपाली सेना, सशस्त्र प्रहरी र स्थानियहरु समेत भई दिनको २ः३५ बजे आगलागी पूर्ण रुपमा नियन्त्रण गर्न सफल भएको प्रहरीले जनाएको छ ।

प्रहरी र सम्बद्ध पक्षको सक्रियतामा आगलागी ४० मिनेटमा नै नियन्त्रणमा लिइएको थियो ।  आगलागीबाट घाइते शम्भु कार्की सामान्य घाईते भएको र उपचार पश्चात डिस्चार्ज भएको प्रहरीले जनाएको छ ।

प्रहरीका अनुसार आगलागी भएको घर आसपासको घरहरुमा जोखिम छैन ।  आगलागीबाट चाउचाउ बनाउने १५ थान मेसिनहरु, चाउचाउ बनाउने सामाग्रीहरु, लत्ता कपडा तथा अन्य सरसामानहरु पुर्ण रुपमा जली नष्ट भएको प्रहरीले जनाएको छ । प्रहरीका अनुसार आगलागीबाट २ करोड २५ लाख बराबरको क्षति भएको छ ।