सामुदायिक विद्यालयमा राजनीतिक गतिविधि गर्न निषेध

डडेल्धुरा । परशुराम नगरपालिकाले नगरपालिका क्षेत्र भित्रका सामुदायिक विद्यालयमा राजनीतिक गतिविधि निषेध गरेको छ ।
नगरपालिकाले आगामी आर्थिक वर्ष २०८०/०८१ देखि लागु हुने गरी राजनीतिक गतिविधि बन्देज गरेको हो ।

आर्थिक वर्ष २०८०/८१ को वार्षिक कार्यक्रम तथा बजेटमा सामुदायिक विद्यालयहरुमा राजनीतिक गतिविधि, बन्द, हड्ताल तथा शैक्षिक गतिविधिमा अवरोध गर्ने खालका क्रियाकलापहरु पूर्ण रुपमा बन्देज लगाउने निर्णय गरिएको नगरपालिका स्रोतले जानकारी दिएको छ ।

सार्वजनिक शिक्षालाई राजनीतिक प्रभावमुक्त, स्वच्छ, नियमित, गुणस्तरीय बनाउँदै विद्यालयलाई शान्ति क्षेत्रको अवधारणालाई मूर्तरुप दिइने अवधारणा अनुरुप कडा नीति अवलम्बन गरिएको नगरपालिका प्रमुख भरत जोशीले बताए ।