पलाञ्चोक भगवती मन्दिरमा दानपेटिका फोडी नगद चोरी गर्ने पक्राउ

धुलिखेल । पलाञ्चोक भगवती मन्दिरमा रहेको दानपेटिका फोडी नगद चोरी गर्ने व्यक्ति पक्राउ परेका छन्। पक्राउ पर्ने व्यक्ति काभ्रेपलाञ्चोक जिल्लाको खानीखोला गाउँपालिका–०७ निवासी ३० वर्षीय रविन खुलाल हुन्।

२०७९ कार्तिक १६ गते राति काभ्रेपलाञ्चोक जिल्लाको पाँचखाल नगरपालिका वडा नम्बर ९ स्थित पलाञ्चोक भगवती मन्दिरमा रहेको दानपेटिका फोडी करिब रु. ७० हजार नगद चोरी भएको घटनाको अनुसन्धानका क्रममा खुलालको संलग्नता पुष्टि भएको थियो।

यसअघि, खुलालले रामेछाप जिल्लाको खाँडादेवी गाउँपालिका–०७ स्थित खाँडादेवी मन्दिरको दानपेटिका फोडी त्यहाँ रहेको नगद चोरी गरेको आरोपमा पक्राउ परी रामेछाप कारागारमा थुनामा रहेको जानकारी प्राप्त भएपछि काभ्रेपलाञ्चोक प्रहरीले थप अनुसन्धान अघि बढाएको हो।

जिल्ला प्रहरी कार्यालय काभ्रेपलाञ्चोकका सूचना अधिकारी प्रहरी नायब उपरिक्षक मिन बहादुर घलेका अनुसार काभ्रेपलाञ्चोकबाट खटिएको प्रहरी टोलीले खुलालको सनाखत गरी उनलाई किटानी जाहेरीका आधारमा झिकाई बयान लिई थप अनुसन्धान प्रक्रिया अघि बढाएको छ।