आभाष साकोसको १३ औं साधारण सभा सम्पन्न
काभ्रे पोष्ट
बनेपा । बनेपा नगरपालि वडा नंं. ८ तीनदोबाटोमा अवस्थित आभाष बचत तथा ऋण सहकारी संस्थाको १३ औं वार्षिक साधारण सभा सम्पन्न भएको छ ।
संस्थाको १३ औँ बार्षिक साधारण सभामा बार्षिक प्रतिवेदन प्रस्तुत गर्दै संस्थाका सचिव प्रकाश कायस्थले संस्थाले संचालन गरेको सुरक्षा कोष अन्तर्गत आवद्ध सदस्यको कालगतिले मृत्यु भएका ३ जनाको परिवारलाई प्रति सदस्य १० हजार, क्यान्सर पिडित ३ जना सदस्यलाई प्रति सदस्य २५ हजार तथा विभिन्न रोग लागेका ३७ जना सदस्यलाई उपचार गर्न प्रति सदस्य १० हजार सहयोग गरेको जानकारी दिए ।
सभामा संस्थाको छोरी अभियान अन्तर्गत यो वर्ष २ जना सदस्यलाई २० हजार सहयोग गरेको पनि बताइएको थियो । उनले सदस्यहरुलाई सहकारी शिक्षा तालिम लगायतको कार्य गर्दै आएको जानकारी दिए ।
त्यसैगरी सभामा संस्थाका कोषाध्यक्ष धर्मभक्त प्रधानले आर्थिक वर्ष ०७८।०७९ को आर्थिक प्रतिवेदन तथा ०७९।८० को कार्यक्रम तथा बजेट प्रस्तुत गरेका थिए । उनले यस आर्थिक वर्षमा ७१ करोड ६४ लाख १२ हजार ७ सय ३२ रुपैयाँको कुल कारोबार गरेको जनाए ।
संस्थाले ५६ करोड ६९ लाख २४ हजार ३ सय ५० रुपैयाँ ऋण लगानी गरी ७७ लाख ८९ हजार ५९ रुपैयाँ खुद मुनाफा गरेको संस्थाले जनाएको छ ।
५ हजार ८ सय ३२ सदस्य रहेको संस्थाको पनौती र भकुण्डेमा सेवाकेन्द्र रहेका छन् । संस्थाले एबिबिएस तथा एसएमएस अलर्ट र रेमिटेन्स सेवा प्रदान गर्ने गरेको जनाइएको छ । साधारण सभाले संस्थाका जेष्ठ सदस्य, उत्कृष्ट कारोबार गर्ने सदस्य, सदस्यका छोरा छोरीमध्ये एसइईमा उत्कृष्ट अंक ल्याउने छात्र छात्रा, र कर्मचारीलाई समेत सम्मान गरेको छ ।
सभा बनेपा नगरापालिका प्रमुख शान्तिरत्न शाक्यको प्रमुख आतिथ्यता र संस्थाका अध्यक्ष दिनेशराज कायष्ठको सभापतित्वमा सम्पन्न भएको थियो ।
काभ्रे पोष्ट
