लिन इन्टरनेशनल बोर्डिङ स्कुल बनेपाको २४औं वार्षिकोत्सव एवं अभिभावक दिवस सम्पन्न
बनेपा । लिन इन्टरनेशनल बोर्डिङ स्कुल बनेपाको २४औं वार्षिकोत्सव तथा अभिभावक दिवस सोमबार भव्य रूपमा सम्पन्न भएको छ।
कार्यक्रमका प्रमुख अतिथि प्याब्सनका केन्द्रीय उप-महासचिव भीमसेन केसी रहनुभएको थियो भने विद्यालयका निर्देशक कृष्ण भण्डारी (शिशिर) को सभापतित्वमा कार्यक्रम सम्पन्न भएको थियो।
कार्यक्रमलाई सम्बोधन गर्दै प्रमुख अतिथि केसीले लिन स्कुलले बनेपा नगरपालिका क्षेत्रमा मात्र नभई राष्ट्रिय तथा अन्तर्राष्ट्रिय स्तरमा प्रतिस्पर्धी विद्यार्थी उत्पादन गर्न महत्वपूर्ण योगदान दिइरहेको भन्दै धन्यवाद व्यक्त गर्नुभयो। साथै, उहाँले विद्यार्थीमैत्री, प्रविधिमैत्री र समयसापेक्ष शिक्षाको आवश्यकताबारे चर्चा गर्दै विद्यालयको निरन्तर सफलताको कामना गर्नुभयो।
विद्यार्थीहरूले विभिन्न सांस्कृतिक प्रस्तुति मार्फत मनोरञ्जन प्रदान गरेको सो कार्यक्रममा वर्षभरिका उत्कृष्ट शिक्षकहरूलाई समेत सम्मान गरिएको थियो।
कार्यक्रममा प्याब्सनका केन्द्रीय सदस्य पूर्णकुमार श्रेष्ठ, काभ्रे प्याब्सनका अध्यक्ष श्याम बहादुर भुजेल, एकीकृत अखिल नेपाल शिक्षक संगठन बागमती प्रदेशका पूर्वअध्यक्ष दुर्गासिं तामाङ, विभिन्न विद्यालयका प्रधानाध्यापकहरू, पत्रकार, अभिभावक, शिक्षक-शिक्षिका तथा विद्यार्थीहरूको उल्लेखनीय उपस्थिति रहेको थियो।
सोही अवसरमा वर्षका उत्कृष्ट शिक्षक प्रतिमा श्रेष्ठ, उत्कृष्ट खेलाडी (सिनियर) छात्र हिमाल श्रेष्ठ तथा छात्रा दिव्शा तामाङ, जुनियर उत्कृष्ट खेलाडी प्रेरक तामाङ र अपेक्षा तामाङलाई सम्मान गरिएको थियो।
विद्यालयका प्रधानाध्यापक श्रीकृष्ण श्रेष्ठले स्वागत मन्तव्य व्यक्त गर्नुभएको उक्त कार्यक्रमको सञ्चालन शिक्षक दीपक तामाङले गर्नु भएको थियो।
