ढलमले खोलाले बगाएकी महिलाको खोजीमा तालिम प्राप्त कुकुरसहितको प्रहरी टोली खटियो

पनौती । काभ्रेको पनौती नगरपालिका वडा नम्बर ५ सुब्बा गाउँ नजिकको ढलमले खोलाले वैशाख २९ गते साँझ बारीबाट घर फर्किंदै गरेकी ३३ वर्षीया रेणुका गिरीलाई बगाएपछि बेपत्ता भएकी थिइन्। घटना भएको दिनदेखि नै खोजी कार्य जारी रहेको छ।

यसैक्रममा, आज २०८२ जेठ १ गते बिहान ८:२५ बजे काठमाण्डौस्थित केनाईन शाखाबाट प्रहरी नायव उपरीक्षक चेत नारायण ज्ञवालीको नेतृत्वमा ३० जनाको टोली घटनास्थलमा परिचालन गरिएको जिल्ला प्रहरी कार्यालय काभ्रेपलाञ्चोकका सूचना अधिकारी डीएसपी मिन बहादुर घलेले जानकारी दिनुभयो।

खोज कार्यमा ५ वटा तालिम प्राप्त कुकुरहरू (३ वटा सर्च एन्ड रेस्क्यू र २ वटा ट्र्याकर डग) समेत प्रयोग गरिएको छ। उद्धार टोलीको प्रयास जारी रहेको छ।