धुलिखेलमा करेन्ट लागेर एक युवाको मृत्यु

धुलिखेल । काभ्रेको धुलिखेल नगरपालिका वडा नम्बर ७, संजीवनी चोकस्थित ११ हजार भोल्ट क्षमताको हाइटेन्सन लाइनको पोलमा काम गर्ने क्रममा करेन्ट लागेर एक युवकको मृत्यु भएको छ।

जिल्ला प्रहरी कार्यालय काभ्रेले दिएको जानकारी अनुसार, आज बिहान करिब ११:३० बजेको समयमा सर्लाही जिल्लाको ईश्वरपुर नगरपालिका वडा नम्बर १२ घारिबथान घर भएका २८ वर्षिय उपेस परियारलाई करेन्ट लागेको हो। उनी पोलमा चढी विद्युत मर्मत कार्यमा खटिएका थिए।

प्रहरीले घटनाको खबर पाउनासाथ प्रहरी निरीक्षक हरेराम नेपालको कमाण्डमा २५ जनाको टोली घटनास्थल पठाएको थियो। नेपालीको शव पोलमै झुण्डिएको अवस्थामा भेटिएको र तत्काल निकालेर पोस्टमार्टमका लागि धुलिखेल अस्पताल पठाइएको प्रहरीले जनाएको छ।

त्यसैगरी, घटनाको थप अनुसन्धान तथा प्रमाण संकलनका लागि प्रहरी निरीक्षक दिनेश बहादुर कुँवरको नेतृत्वमा SOCO (Scene of Crime Officer) सहितको थप टोली खटिएको थियो। घटनास्थल जिल्ला प्रहरी कार्यालय काभ्रेदेखि करिब ३०० मिटर दक्षिणमा पर्ने बताइएको छ।

काभ्रेमा यसअघि बनेपा नगरपालिका वडा नम्बर ४ मा मध्यराति विद्युत सर्ट हुँदा ठुलो क्षति र आर्थिक नोक्सानी भएको थियो ।