मोतियाविन्दुको निःशुल्क उपचार गर्न सम्झौता

भकुण्डेवेशी ।  नमोबुद्ध नगरपालिकाले मोतियाविन्दु भएका नगरवासीलाई निशुल्क उपचार (शल्यक्रिया) को व्यवस्था मिलाएको छ ।

रेयुकाई एइको मासुनासा आँखा अस्पताल बनेपासंग सम्झौता गरेर निःशुल्क उपचारको व्यवस्था मिलाइएको नगर प्रमुख कुन्साङ लामाले जानकारी दिए ।

नगरबासीहरूलाई दृष्टिको समस्या नहोस् भनेर यस्तो व्यवस्था मिलाएको नगर प्रमुख लामाले बताए । प्रमुख लामाका अनुसार मोतियाबिन्दुको समस्या भएकाले वडाबाट सिफारिस लिएर बनेपास्थित रेयुकाई आँखा अस्पतालबाट सेवा लिन सक्नेछन् ।

वडाको सिफारिस लिएर आउने सबैलाई निःशुल्क उपचारको व्यवस्था मिलाइने अस्पताल सञ्चालक समितिका महासचिव हिरामणि शर्माले जानकारी दिए ।

नगरपालिका र अस्पतालविच समझदारीपत्रमा हस्ताक्षर गरिएको छ । नगरपालिकाको तर्फबाट प्रमुख कुन्साङ लामा, प्रमुख प्रशासकीय अधिकृत शिवप्रसाद लम्साल र अस्पतालको तर्फबाट अध्यक्ष मधुप्रसाद आचार्य र महासचिव हिरामणि शर्माले हस्ताक्षर गर्नुभएको छ ।

मोतियाविन्दु पहिचानको लागि नगरपालिकाले अस्पतालको प्राविधिक सहयोगमा विभिन्न समयमा आँखा शिविर समेत गर्दै आएको छ ।