बुडोल सामुदायिक साकोसको २३ औं वार्षिक साधारण सभा सम्पन्न

• सबैको सहयोगबाट संस्था अगाडि बढ्छ: अध्यक्ष केसी

बनेपा । काभ्रेको बनेपामा मुख्य कार्यालय रही काभ्रे जिल्लाभर कार्यक्षेत्र रहेको बुडोल सामुदायिक बचत तथा ऋण सहकारी संस्था लि. को २३ औं वार्षिक साधारण सभा सम्पन्न भएको छ ।

साकोसको वार्षिक साधारण सभा क्षेत्रगत रुपमा बनेपा, धुलिखेल र नाला गरी ३ क्षेत्रमा सम्पन्न भएको हो । बनेपामा संस्थाका अध्यक्ष कैलाश केसी, धुलिखेलमा लेखा सुपरीवेक्षण समिति संयोजक पूर्णबहादुर कार्की र नालामा सचिव जयराम थापाको सभापतित्वमा कार्यक्रम सम्पन्न भएको संस्थाले जनाएको छ । कार्यक्रमलाई सम्बोधन गर्दै संस्थाका अध्यक्ष कैलाश केसीले यही आर्थिक वर्षभित्र जिल्लाको नमोबुद्ध नगरपालिका अन्तर्गत भकुण्डेवेशी सेवा केन्द्रको स्थापना गर्ने बताउनुभयो । त्यस्तै अध्यक्ष केसीले सदस्यहरूलाई आफ्ना, सल्लाह, सुझाव दिन आग्रह गर्दै सबैको सहयोगवाट संस्था अघि बढ्ने बताउनुभयो ।

सभामा बनेपा क्षेत्रको कार्यक्रम संचालन लेखा सुपरिवेक्षण समतिकी सदस्य शर्मिला नेपालले, स्वागत मन्तव्य संचालक समिति सदस्य गीता कुँवर क्षेत्रीले र प्रतिवेदन प्रस्तुत सह–कोषाध्यक्ष राधाकृष्ण श्रेष्ठले प्रस्तुत गर्नु भएको थियो । धुलिखेल क्षेत्रको कार्यक्रम संचालन पूर्व शिक्षा अधिकृत नविन बडालले, स्वागत मन्तव्य संचालक समिति सदस्य गायत्री खड्काले र प्रतिवेदन प्रस्तुत उपाध्यक्ष प्रेमनाथ शर्मा कोईरालाले प्रस्तुत गर्नु भएको थियो ।

नाला क्षेत्रको कार्यक्रम संचालन टुकुचा जागरण सेवाकेन्द्र व्यवस्थापन उपसमिति सदस्य जयराम श्रेष्ठले, स्वागत मन्तव्य संचालक समिति सदस्य अनिला श्रेष्ठ र प्रतिवेदन प्रस्तुत सहसचिव प्रकाश भुर्तेलले प्रस्तुत गर्नु भएको थियो ।

सभामा कुल सदस्य संख्याको ५९ प्रतिशत सदस्यहरुको उपस्थिति रहेको र संस्थामा आवद्ध शेयर सदस्यहरुलाई शेयर लाभांश र बाल बचतकर्ता सदस्यहरुलाई बचतको आधारमा कापि, पेन्सील र पेन वितरण आगामी असोज ६ गतेदेखि वितरण गरिने संस्थाले जनाएको छ ।

बुडोल सामुदायिक साकोसले सदस्यको हितलाई विशेष प्राथमिकतामा राखी योजना एवं कार्यक्रम गर्ने संस्थाका का‍.मु. नायब प्रमुख कार्यकारी अधिकृत रामकृष्ण रायक्षेत्रीले बताउनुभयो।