लायकु हाटबजारमा आकर्षण बढ्दो

बनेपा । बनेपा नगरपालिकाद्धारा सञ्चालित लायकु हाटबजारको आकर्षण बढ्दै गएको छ । बनेपा नगरपालिका स्थित लायकुमा हाटबजार लाग्न थालेपछि स्थानीय तरकारी, फलफूल लगायत दैनिक उपभोग्य सामान खरिद विक्री हुन थालेसँगै स्थानीय कृषक, व्यापारी एवं उपभोक्ता खुसी देखिएका छन् । कृषकसँगै फुटपाथ बजार राख्न नपाएका साना व्यापारीहरुले समेत आफ्ना सामान बेच्नको लागि प्लाटफर्म पाएका हुन् ।

हरेक शुक्रबार लाग्ने हाटबजारमा तरकारी लगायतका स्थानीय उत्पादनसँगै साना व्यापारिहरुले विभिन्न सामग्री बेच्न राख्ने गरेका छन् । शुक्रबारे हाटबजारले कृषकलाई आफ्ना उत्पादन बेच्न सहर चाहार्नुपर्ने, बिचौलियालाई थोरै रकममा बेच्नुपर्ने अवस्थाको अन्त्य भएको बताइएको छ । साथै सुपथ मुल्यमा भान्सा देखि आधारभूत आवश्यकता पूर्ति गर्ने सामग्री खरिद गर्न पाउँदा स्थानीय पनि हर्षित देखिएका छन् । हाटबजारको प्रचलन नेपालको विभिन्न क्षेत्रहरुमा धेरै पहिलादेखि भएतापनि बनेपामा यो नौलो अभ्यास हो ।

जिल्लाका अन्यत्र ठाउँबाट किसानले उत्पादन गरेको उपजले हाटबजारमा बजार पाउन थालेको छ । उत्पादकलाई सिधैँ उपभोक्तासँग जोड्न बनेपा नगरपालिकाले हाटबजार सुरु गरेको बनेपा नगरपालिका प्रमुख शान्तिरत्न शाक्य बताउँछन् । पहिलापहिला किसानले उत्पादन गरेका वस्तुले बजार पाउँदैनथ्यो । अहिले हाटबजारले किसानले उत्पादन गरेको वस्तुहरु सहजै विक्री हुन थालेको प्रमुख शाक्य बताउँछन् । स्थानीय उत्पादनले प्रचार र बजार नपाएकाहरुलाई हाटबजारले ठुलो सहयोग पुर्याएको छ । हाटबजारमा आफ्नो सामान विक्री गर्न राखेका एक कृषकले काभ्रेपोष्टलाई भने, “मलाई अझै सम्झनामा आउँछ, अस्तिसम्म आगन मै फलेका तरकारी, फलफूल र अन्न बारीमै कुहिएर खेर गएको दुःख गरेको वस्तुले बजार नपाउँदा भएको पीडा अहिले हाटबजार खुलेपछि उत्पादित वस्तु बजारमा विक्री गर्न सजिलो हुनुका साथै अर्थोपार्जन राम्रो भएको छ ।”

हाटबजारमा कृषकले उत्पादन गरेका गोलभेडा, अदुवा, खुर्सानी, लसुन, सिमी, साग, काँक्रो, गाजर लगायत दैनिक उपभोग्य वस्तु विक्री हुने गरेको पाइएको छ । किसानले उत्पादन गरेको कृषि उपजले राम्रो र उचित मूल्य पाउनुका साथै सहज रुपमा विक्री गर्ने वातावरण मिलेको कृषकहरु बताउँछन् । हाटबजारले किसानको आयआर्जनमा सकारात्मक प्रभाव पारेको छ । बनेपा नगरपालिकाले जिल्लामै पहिलो शुक्रबारे हाटबजार सञ्चालनमा ल्याएको हो । अन्य नगरपालिका र स्थानीय तहहरुले समेत यस्तो कार्यलाई प्राथमिकतामा राखी अगाडि बढाउनुपर्ने देखिन्छ । किसानको उपज विक्री हुनु र किसानले गरेको कामको उचित मूल्यांकन भएमा जिल्लामा आत्मनिर्भर कृषकको संख्या वृद्धि हुने देखिन्छ ।