काभ्रे सहकारीमा सहयात्राको नयाँ सुरुवात: बाजे बजै चौतारी तथा क्रेडिट कार्ड
पनौती । पनौती नगरपालिका वडा नम्बर ६ गुराँसमार्गमा मुख्य कार्यालय रहेको सहयात्रा देवीस्थान बहुउद्देश्यीय सहकारीले समुदाय र सदस्य केन्द्रित नयाँ कार्यक्रमको सुरुवात गरेको छ ।
सहकारीले काभ्रेपलाञ्चोक जिल्लामै पहिलो पटक बाजे बज्यै चौतारी कार्यक्रम तथा सहकारी पसल क्रेडिट कार्ड सेवा सुरु गरेको हो । संस्थाले पनौती नगरपालिका वडा नं. ४, एैरिगाँउ पुलबजारमा रहेको देवीस्थान सेवाकेन्द्र प्राङगणमा बाजेबजै चौतारी तथा सहकारी पसल क्रेडिट कार्ड अभिमुखीकरण गर्दै कार्यक्रमको औपचारिक सुरुवाता गरेको हो ।
संस्थाले चालु आ.व. को बार्षिक योजना तथा कार्यक्रम अनुसार शिक्षा उपसमितिको संयोजकत्व तथा देवीस्थान सेवाकेन्द्र संचालन उपसमितिको व्यवस्थापनमा कार्यक्रम सम्पन्न गरिएको उल्लेख गरिएको छ ।
कार्यक्रमका प्रमुख अतिथि एवं पनौती नगरपालिका वडा नं.४ का वडा अध्यक्ष दिपक प्रसाद दाहालले ऐरीगाँउ समुदायका १५ जना ज्येष्ठ नागरिकलाई सम्मान गर्दै संस्थाले जारी गरेको सहकारी पसल क्रेडिट कार्डका आवेदकहरुलाई कार्ड वितरण गर्नुभएको थियो ।
कार्यक्रमलाई सम्बोधन गर्दै वडाध्यक्ष दाहालले सहकारीमा समस्या र चुनौतीहरु थपिएको बताउँदै सदस्य आफै पनि व्याजको प्रलोभनमा परि पीडित भएको बताउनुभयो । ठग नियतका केहि सहकारी माफियाहरुका कारण असल सहकारीहरुलाई समेत काम गर्न गाह्रो भएको अध्यक्ष दाहालको स्पष्टोक्ति थियो ।
कार्यक्रममा संस्थाका प्रमुख व्यवस्थापक गौतम प्रजापतिले संस्थाबाट जारी क्रेडिट कार्डको नीति, नियम, उपयोगिता र कारोबार सिमा बारे जानकारी गराएका थिए ।
ज्येष्ठ नागरिक जीवन समय व्यवस्थापन विषयक प्रस्तुती सहजीकरण संस्थाका संस्थापक अध्यक्ष देव बहादुर तामाङले गरेका थिए ।
कार्यक्रमको सञ्चालन संस्थाका सचिव हरिशंकर तिमल्सिनाले गरेका थिए । कार्यक्रम संस्थाका अध्यक्ष गोविन्द प्रसाद न्यौपानेको अध्यक्षतामा सम्पन्न भएको थियो ।
बाजे बज्यै चौतारी कार्यक्रम के हो ?
बाजे बज्यै चौतारी कार्यक्रम अन्तर्गत सहकारीले जेष्ठ नागरिकलाई उनीहरूका जीवनमा भोगाईसम्बन्धी घटना भन्न लगाई सम्मान गरिने कार्यक्रम हो । नयाँ पुस्तालाई पुराना पुस्ताका दु:ख र भोगाई बारे जानकारी गराउने उद्धेश्यले कार्यक्रम सुरु गरिएको हो । वृद्दवृद्दालाईको भावनालाई सम्बोधन गर्ने वातावरणको सिर्जना गर्न र वृद्धवृद्धको जीवनका अविष्मरणीय भोगाईलाई समेट्ने कार्यक्रमको ध्येय रहेको छ । जेष्ठ नागरिकलाई आइपर्ने समस्या र त्यसलाई समाधान गर्न गर्नुभएको प्रयास आजको पिढीँलाई मार्गदर्शन समेत हुने संस्थाको विश्वास रहेको छ ।
सहकारी पसल क्रेडिट कार्ड के हो ?
दैनिक उपभोग्य वस्तहरू विक्री गर्ने उपभोक्ता सहकारी पसल । जहाँ पैसा नहुँदा पनि सहकारीका सदस्यले अधिकतम ३० हजार सम्मको कारोबार गर्न सक्नेछन् । उक्त क्रेडिट कार्ड मार्फत दैनिक उपभोग्य वस्तुहरू खाद्यान्न, तरकारी लगायतका वस्तहरू खरिद गर्न सकिने संस्थाका प्रमुख व्यस्थापक गौतम प्रजापतिले जानकारी दिए । निवेदनको आधारमा सदस्यको सहकारीमा बचत, नियमित मासिक बचत लगायतका मानकका आधारमा सदस्यको अधिकतम कारोबार सीमा तय गरि कार्ड प्रदान गरिने संस्थाले जनाएको छ । त्यसरी ऊधारोमा वस्तु तथा सेवा खरिद गरेवापत सदस्यले ३५ दिनभित्र रकम भुक्तानी गर्नुपर्ने हुन्छ ।
कार्डमा सदस्यको नाम, मोबाइल नम्बर, सदस्यता नम्बर, फोटो समावेश गरिएको हुन्छ । कार्डको पछाडिको भागमा रहेको कार्डको रंगबाट सदस्यले प्राप्त गर्ने अधिकतम कारोबारको जानकारी प्राप्त गर्न सकिने संस्थाले जनाएको छ।
पहेको रंगले कम, हरियोले मध्यम र रातो रंग भएको कार्ड प्राप्त गर्ने सस्यले अधिकतम कारोबार गर्ने सक्ने संस्थाका प्रमुख व्यवस्थापक गौतम प्रजापतिले जानकारी दिनुभयो । हाल देवीस्थान सेवा केन्द्रमा एक पसल रहेको छ । साथै थप १।२ वटा पसलसँग समन्वय गर्ने तयारी रहेको संस्थाले जनाएको छ । हाललाई क्रेडिट कार्डमा भएको खाता नम्बरको आधारमा कारोबार हुने संस्थाले जनाएको छ । आवश्यक महसुस भएमा संस्थाले निकट भविष्यमा कार्ड स्वाइप गरेर सामान खरिद गर्न मिल्ने सेवा सुचारू गर्ने बताइएको छ ।
