बनेपामा पानीपुरी चटपटे लगायत खुला ठेलामा खाद्य वस्तु विक्री वितरणमा रोक

बनेपा । काभ्रेको बनेपा नगरपालिकाले हैजा, झाडापखाला लगायतका सरुवा रोगबाट बच्न पानीपुरी चटपटे लगायतका खुला सामग्री विक्री वितरणमा रोक लगाएको छ । नगरपालिकाले एक सूचना जारी गर्दै हैजा झाडापखालाबाट बच्न नगरबासीलाई आग्रह गरेको छ ।

हाल काठमाडौं उपत्यकामा हैजा झाडापखालाका बिरामीहरू देखापरिरहेको सन्दर्भमा बनेपा नगरपालिकामा पनि संक्रमण हुन सक्ने भएकाले सुरक्षित रहन खुल्ला खाद्यवस्तु उपभोगमा रोक लगाइएको नगरपालिकाले जनाएको छ ।

वर्षा याममा अधिक मात्रामा हैजा झाडापखाला फैलिन सक्ने भएकाले चर्पीमा मात्र दिसापिसाब गर्न, दिसापिसाब गरी सकेपछि साबुन पानीले मिचिमिची हात धुन, खाना खानु बनाउनु अगाडि साबुन पानीले हात धुन, पानी शुद्धीकरणका विविध उपाय अपनाएर मात्र पिउन एवं बासी, सडेगलेको, झिङ्गा भन्केको खानेकुरा नखान आम नगरबासीहरूलाई नगरपालिकाले आग्रह गरेको छ ।