नव क्षितिज साप्ताहिकको रजत लोगो सार्वजनिक: २५औं वर्ष प्रवेशको अवसरमा विशेष तयारी

बनेपा । असल शासन र ग्रामीण पत्रकारितालाई आधार बनाउँदै काभ्रेमा स्थापना भएको नव क्षितिज साप्ताहिक पत्रिका २४ वर्ष पूरा गरी २५औं वर्षमा प्रवेशको दौडमा छ । काभ्रेपलाञ्चोक जिल्लाबाट हरेक सोमबार प्रकाशन हुँदै आएको पत्रिकाले २५ वर्षे यात्रा तय गरेको हो । यस अवसरमा रजत जयन्ती समारोह आयोजना गर्न व्यापक तयारी थालिएको पत्रिकाका प्रकाशक एवं प्रधानसम्पादक नवराज बजगाँईले जानकारी दिए ।

रजत जयन्तीको सुरुवाती कार्यक्रमअन्तर्गत पत्रिकाको रजत लोगो सार्वजनिक गरिएको छ। फागुन २३ गते शुक्रबार सभामुख देवराज घिमिरे र पत्रिकाका प्रधान सम्पादक नवराज बजगाईले संयुक्त रूपमा लोगो सार्वजनिक गरे। अध्यक्ष बजगाईका अनुसार लोगो पत्रिकाको २५ वर्षे यात्राका बिभिन्न आयामहरूको प्रतिनिधित्व गर्ने गरी तयार गरिएको छ।

रजत जयन्ती कार्यक्रम २०८२ बैशाख ८ गते काभ्रेको धुलिखेलमा आयोजना गरिने छ । कार्यक्रमका लागि सञ्चार तथा सूचना प्रविधि मन्त्री पृथ्वी सुब्बा गुरुङ, प्रेस चौतारी नेपालका महासचिव हिरामान लामा, युवा व्यवसायी राजेन्द्र थापा लगायतले अग्रिम शुभकामना व्यक्त गरिसकेका छन्।

रजत जयन्ती उद्घाटन समारोहमा विभिन्न महत्वपूर्ण कार्यक्रम आयोजना गरिने बताइएको छ, जसअन्तर्गत पत्रिकालाई निरन्तर सहयोग गर्ने व्यक्तित्वहरूको सम्मान, रजत गीत सार्वजनिक, सम्बन्धित पुस्तकहरू र स्मारिका विमोचन साथै विविध अन्य कार्यक्रमहरू समेत आयोजना गरिने बताइएको छ ।

पत्रिकाका सह–सम्पादक अरबिन्द्र गौतमले नव क्षितिज साप्ताहिकको २५ वर्षे यात्रालाई विशेष रूपमा मनाउन तयारी थालिएको जानकारी दिए ।